Чÿк уйăхĕн 19-мĕшĕнче Шупашкарти Трактор тăвакансен культура керменĕнче Светлана Асамат ячĕллĕ «Асамат эрешĕсем» регионсенчи концерт-фестиваль иртрĕ. Фестивале Светлана Асамат çуралнăранпа 70-çул çитнине халалланă.Светлана Асамат - Чăваш Республикин искусствăсен тава тивĕçлĕ деятелĕ, Ульяновск облаçĕн культура тава тивĕçлĕ ĕçченĕ, Çеçпĕл Мишши премийĕн лауреачĕ, Раççей Писательсен союзĕн, Чăваш Композиторсен ассоциацийĕн членĕ, Чăваш халăх поэчĕ, кĕскен каласан -  чăваш халăхĕ лайăх пĕлекен сăвăç, юрăç, композитор.

Фестивале хĕрĕхе яхăн фольклор ушкăнĕ хутшăннă, вĕсем конкурса видеомаериалсем ярса панă. Вĕсенчен çурри 3-мĕш тура хутшăнма йыхрав илнĕ. Вĕсен хушшинче Пучинке культура çурчĕ çумĕнчи «Юхăм» ушкăн тата Пучинке шкулĕн 10 класс вĕренекенĕ Виктория Захарова. Пучинкесем фестиваль çĕнтерÿçисен «Гран-при» кубока тата ІІІ степеньлĕ диплома çĕнсе илчĕç. Çĕнтерÿçĕсене чĕререн саламлатпăр, малашне те ăнăçусем сунатпăр.