Ака уйăхĕн 28-мĕшĕнче Чăваш Тимешри вăтам шкулта тăван (чăваш) чĕлхипе литературине вĕрентекенсен  район  шайĕнчи «Уçă урок» 8-мĕш фестивалĕ иртрĕ.  Фестивале Чаваш Республикин  Мухтавлă ентешсен  çулталăкне халалланă. Фестивале йĕркелекенсем - Йĕпреç район администрацийĕн вĕренÿ пайĕ, Йĕпреç районĕн чăваш чĕлхипе литератури вĕрентекенсен ассоциацийĕ, Чăваш наци конгресĕн Йĕпреç район уйрăмĕ.

 Фестивалĕн теллевĕ – педагогикăри тата методикăри çĕнĕ мелсемпе, меслетсемпе ĕçлекен вĕрентекенсен ĕçĕ-хĕлĕпе паллашасси.

Мероприятие вĕрентекенсем активлă хутшăнчĕç: чĕлхепе, литературăпа уçă уроксем ирттерчĕç.  Евдокимова Н.А. тата Ягодова  класс тулашĕнчи ĕç – «?» литературăпа музыка композицийĕ йĕркеленĕ.  Конкурса хутшăнакансем урокра педагогикăри тата методикăри çĕнĕ технологисемпе тата мелсемпе тухăçлă усă курчĕç. 8-мĕш класра вĕренекенсем А.А.Ядрицова вĕрентекенпе чавашсен мухтавлă ывалĕпе, чăвашсен чи малтанхи словарьне çыраканăн Н.И.Ашмаринăн пурнăçĕпе, ĕçĕ-хĕлĕпе паллашрĕç. 7-мĕш класра вĕренекенсем Е.М.  Михайловăпа чăваш сурпанĕн илемĕпе пĕлтерĕшне тишкерчĕç. Чăвашсен салтака ăсанакан ывăлĕсене сурпан парса ярасси – авалтан юлнă чăваш йăли. Авалхи тĕрĕсемпе тĕрленĕ амăшĕн сурпанĕсем - телей сурпанĕсем вĕсем. Амăшĕн пехилĕпе парса яракан сурпан ывăлне тĕрĕс-тĕкелех килне çитерет тенĕ. Халăх историне пĕлни, упраса хăварни, йăх-тымара тĕпчени вăл – патриотизм пулнине палăртрĕç вĕренекенсем.

Фестиваль тухăçлă иртрĕ, пуриншĕн те усăллă пулчĕ.

А.А.Ядрицова (Йĕпреç 2-мĕш вăтам шкулĕ), Е.М.Михайлова (Пучинке вăтам шкулĕ), Р.А. Евдокимова, О.В. Ягодова (Чăваш Тимеш вăтам шкулĕ) çĕнтерÿçĕсем пулса тăчĕç.  

Фестивале хутшăннисене пурне те саламлатпăр, малалла та тăрашса ĕçлеме  вăй-хал сунатпар!