М. Е. Евсевьевăн ĕмĕр тăршшĕпех пухнă тата çырса хатĕрленĕ ĕçĕсене Мордва кĕнеке издательстви 1961-66 çулсенче пилĕк томпа пичетлесе кăларнă. Вĕсене вулакансем патне çитерес ĕçре Мордва Республикин Министрсен Совечĕ çумĕнчи чĕлхепе литературăн, историпе экономикăн наука-тĕпчев институчĕ, асăннă республикăри патшалăхăн Тĕп архивĕ уйрăмах нумай тимленĕ. Томсем кун çути куриччен Саранскри паллă тĕпчевçĕсемпе ăсчахсем, ăслăлăх çыннисемпе çыравçăсем Евсевьев çуралнă яла пĕрре кăна мар килсе кайнă, кунти ял çыннисенчен ĕлĕкрен упранса юлнă юрăсене магнитофонпа çыра-çыра илнĕ. Пĕрремĕш томра пĕтĕмпех ирçесем хушшинче авалтан сарăлнă халăх юррисем. Вĕсенчен паллăраххисен шутне çаксене кĕртмелле: истори темисене тĕпе хунисем, легендăсем, çемье, йăла, салтак юррисем. Юрăсене ирçелле кăна мар, вырăсла та куçарса пичетлени кĕнекепе усă куракансен йышне палăрмаллах ÿстерет.