Кирово ял администрацийĕн тĕп ялĕнче, Пăкăянта иртнĕ шăматкун Чăваш Республикин Патшалăх Канашĕн депутачĕн, «Волгароснефтетрансăн» генеральнăй директорĕн Павел Семеновăн парнисене çĕнсе илессишĕн волейболистсен районсем хушшинчи турнирĕ пулчĕ. Йĕркелÿ комитечĕ унта хутшăнакансем патне йыхрав хучĕсем вăхăтра çитернĕ пулсассăн та, палăртнă кун вăрман варринче вырнаçнă яла Пăрачкавпа Вăрнартан тата Йĕпреçрен кăна командăсем килчĕç. Анчах та çакă ăмăрту хĕрÿлĕхне нимĕн чухлĕ те чакармарĕ. Пăкăянти культурăпа кану паркне пынисем вăйлă командăсем пĕр-пĕринпе тупăшнине чылайччен сăнарĕç. Турнирта пăкăянсем хăйсем те вăй виçме шутлани ял çыннисен кăмăл-туйăмне пушшех ÿстерчĕ. Пăрачкавсем ку хутĕнче те хăйсем чи вăйлине çирĕплетсе пачĕç. Çак районăн пĕрлештернĕ команди Павел Семеновăн тĕп парнине, 4 пин тенкĕ премие тивĕçрĕ. Иккĕмĕш вырăна тухнă вăрнарсен командин кашни вăйăçине фотоаппаратпа чысларĕç. Пьедесталăн виççĕмĕш картлашкине йĕп-реçсен пĕрлештернĕ команди йышăнчĕ. Кашни вăйăç депутатăн парнине - волейбол мечĕкне тивĕçрĕ. Турнира хутшăннă хĕрарăмсен 3 командинчен площадка хуçисем - пăкăянсем чи маттуррисем пулчĕç. Ял администрацийĕ йĕркеленĕ çамрăксен команди çĕнте-рÿçĕ пулса тăчĕ. Калас пулать, пăкăянсем хĕрарăмсен тепĕр командине те тăратнă. Вăл, пирĕн йĕпреçсем хыççăн, виççĕмĕш вырăна тухрĕ. Çĕнтерÿçĕсене, ăмăртăва хутшăннă мĕнпур командăсен членĕсене ЧР Патшалăх Канашĕн депутачĕ Павел Семенов парнесем пачĕ, вĕсене сывă пурнăç йĕркисене сарас ĕçре çĕнĕ çитĕнÿсем тума ырлăх-сывлăх сунчĕ. Турнир хупăннă май, спортсменсене çавăн пекех Кирово ял администрацийĕн пуçлăхĕ Г. П. Егоров, район администрацийĕн пуçлăхĕн пĕр-ремĕш çумĕ В. Л. Михалик ăшшăн саламларĕç. Ăмăртăва лайăх йĕркелеме пулăшнăшăн пăкăянсем Йĕпреçри «Древстрой» ОООн тĕп директорне А. П. Кузьмина, Кирово лесничествин лесничине В. Н. Мосолова, А. С. Яндутов, А. Н. Константинов предпринимательсене тата çул-йĕрпе патруль службин инспекторне В. И. Андреева чун-чĕререн тухакан тав сăмахĕ каларĕç. Павел Семенов пирĕн районта ÿлĕмрен те çакăн пек турнирсем йĕркелеме пулни çинчен пĕлтерчĕ.