Районти йывăр атлетсем Пучинке çамрăкне Александр Семенова пĕлме тивĕç. Вăл кире пуканĕ йăтма икĕ çул каялла кăна тытăннă-ха, Йĕпреçри ачасемпе çамрăксен спорт шкулĕн ялти филиалне (тренерĕ - М. В. Петров) çÿреме пуçланă хыççăнах районти, республикăри ăмăртусенче лайăх кăтартусемпе савăнтарма ĕлкĕрчĕ. Кĕске хушăра Александр Семенов кире пуканĕ йăтассипе пĕрремĕш спорт разрядне тултарчĕ. Малтанхи тапхăрта вăл 75 килограмм таякан виçе категорийĕнче вăй виçнĕ. 2001 çулхи раштав уйăхĕнче Кÿкеç посело-кĕнче Калинин салтак-интернационалист парнисемшĕн иртнĕ республикăри турнирта, пĕлтĕрхи пуш уйăхĕнче “Урожай” физкультурăпа спорт общес-твин Куславккари ăмăртăвĕнче виççĕмĕш вырăнсене тухнă. Кăçалтан пуçласа вара Пучинке каччи 80 килограмлă атлетсем хушшинче тупăшать. Акă, пуш уйăхĕнче Канаш район администрацийĕн пуçлăхĕ С. В. Антонов парнисене çĕнсе илессишĕн Вырăскас Пикшик ялĕнче ирттернĕ республикăри ăмăртура Саша каллех виççĕмĕш вырăна тухнă. “Урожай” физкультурăпа спорт обществин кăçалхи ăмăртăвĕнче те вăл виççĕмĕш пулнă. Ун чухне Саша 24 килограмлă кире пуканне икĕ алăпа 145 хут çĕкленĕ. Çуркунне Александр Семенов, районта мала тухассишĕн пынă ăмăртăва хутшăнса, çĕнтерÿçĕ ят-не тивĕçнĕ. Çĕртме уйăхĕн 7-мĕшĕнче Йĕпреçри Акатуйра та спортăн çак енĕпе пĕрремĕш пулчĕ. Ун хыççăнах ра-йонти Спорт фестивалĕнче 16 çулхи каччă кире пуканĕ йăтассипе иккĕ-мĕш пулчĕ, хăйĕн тренерне М. В. Петрова пĕр очко кăна выляса ячĕ. Александр Семенов спортăн ытти енĕсене те кăмăллать. Вăл баскетбол, волейбол, стритбол ăмăртăвĕсенче те пултаруллă. Кăçал Александр Семенов Пучинкери вăтам шкултан пĕлÿ илсе тухрĕ. Спортра ăста пулни ăна пурнăçăн анлă çулĕ тăрăх шанчăклăн утма, йывăрлăхсене парăнтарса пыма пулăшасса шанса тăратпăр.